मेष (चु, चे, चो, ला, लि, लु, ले, लो, अ)
राजनीति तथा समाजसेवामा क्रियाशील व्यक्तिका लागि प्रभाव विस्तार गर्ने अनुकूल समय छ। व्यावसायिक गतिविधिमा उत्साहजनक वृद्धि हुन सक्छ भने आम्दानीमा सकारात्मक सुधार देखिन्छ। इमानदारी र परिश्रमको कदर हुनेछ। प्रविधिको प्रयोगले अध्ययन तथा अभिव्यक्तिमा सहजता ल्याउनेछ। यद्यपि, बिहीबारपछिका दिनमा स्वास्थ्यमा केही कमजोरी देखिन सक्ने भएकाले अनावश्यक यात्रा तथा जोखिमपूर्ण निर्णयबाट टाढा रहनु उपयुक्त हुनेछ।
बृष (इ, उ, ए, ओ, बा, बि, बु, बे, बो)
सप्ताहको प्रारम्भ र अन्त्य भागमा बौद्धिक तथा सिर्जनात्मक क्रियाकलापमा सफलता मिल्नेछ। धार्मिक चासो र आध्यात्मिक झुकाव बढ्ने सम्भावना छ। पारिवारिक सम्बन्ध सुदृढ हुनेछ र व्यापारिक लाभ प्राप्त हुनेछ। यद्यपि, मध्य सप्ताहमा आलोचना वा गलत बुझाइको सम्भावना रहेकाले प्रशासनिक वा सार्वजनिक कार्यमा विशेष सतर्कता आवश्यक हुनेछ।
मिथुन (का, कि, कु, घ, ङ, छ, के, को, ह)
सामान्य घटनाक्रमका बीच आत्मीय व्यक्तिहरूसँग मतभेद बढ्न सक्छ। नयाँ योजनाको सट्टा वर्तमान कामलाई निरन्तरता दिने रणनीति उपयुक्त हुनेछ। प्रेम सम्बन्धमा द्विविधा उत्पन्न हुन सक्छ। तर अध्ययन, प्रशासनिक कार्य तथा सरकारी मामिलामा प्रगति हुने देखिन्छ। धार्मिक यात्राको संकेतसमेत देखिन्छ।
कर्कट (हि, हु, हे, हो, डा, डि, डु, डे, डो)
शैक्षिक तथा प्रतिस्पर्धात्मक क्षेत्रमा सक्रिय रहेका व्यक्तिहरूका लागि साता लाभदायक रहनेछ। व्यवसायमा सकारात्मक उन्नति देखिनेछ भने प्रेम सम्बन्धमा समेत समझदारी बढ्नेछ। तर, सवारीसाधन प्रयोग गर्दा तथा खानपानमा विशेष ध्यान पुर्याउनु श्रेयस्कर हुनेछ। पारिवारिक तनावका संकेत देखिएकाले सहिष्णुता र संयमता आवश्यक हुनेछ।
सिंह (मा, मि, मु, मे, मो, टा, टि, टु, टे)
पुराना अधुरा कार्यहरू पूरा भई आत्मबल र आत्मविश्वासमा वृद्धि हुनेछ। न्यायिक तथा व्यावसायिक क्षेत्रमा सफलता प्राप्त हुनेछ। व्यक्तिगत सम्बन्धमा प्रगाढता आउनेछ। यद्यपि, बिहीबारपछि स्वास्थ्य तथा पारिवारिक विषयमा सतर्कता अपनाउनु आवश्यक हुनेछ।
कन्या (टो, प, पि, पु, ष, ण, ठ, पे, पो)
शैक्षिक क्षेत्र र यात्रामा प्रगति हुने समय हो। पारिवारिक सहयोग प्राप्त भई व्यापार तथा पेशागत जीवनमा लाभ मिल्नेछ। प्रेम सम्बन्धमा पनि सकारात्मक ऊर्जा देखिन्छ। तथापि, न्यायिक मामिला तथा स्वास्थ्यमा सावधानी अपनाउनु आवश्यक छ। खर्चमा समेत वृद्धि देखिने सम्भावना छ।
तुला (र, रि, रु, रे, रो, ता, ति, तु, ते)
सप्ताहको प्रारम्भमा स्वास्थ्यमा कमजोरी तथा मानसिक चपेटाको सम्भावना देखिन्छ। न्यायिक विवादमा नपर्नु नै उपयुक्त हुनेछ। यद्यपि, सप्ताहको मध्यदेखि परिस्थितिमा क्रमिक सुधार हुनेछ। आफन्त तथा शुभचिन्तकहरूको साथ र सहयोगले मनोबल उच्च राख्न सहयोग पुर्याउनेछ।
वृश्चिक (तो, ना, नि, नु, ने, नो, या, यि, यु)
शैक्षिक गतिविधि, यात्राका अवसर तथा दाजुभाइको सहयोगबाट मनोबलमा वृद्धि हुनेछ। प्रेम सम्बन्धमा स्थायित्व आउनेछ। विचार, लेखन वा सञ्चार माध्यमद्वारा सामाजिक प्रभाव बढ्नेछ। यद्यपि, राजनीतिक तथा सामाजिक वृत्तमा रहेका व्यक्तिहरूले आलोचनाबाट बच्न सचेत रहनु आवश्यक हुनेछ।
धनु (ये, यो, भ, भि, भु, ध, फा, ढ, भे)
व्यवसायमा प्रगति हुने र आम्दानीमा वृद्धि हुने अनुकूल समय छ। पारिवारिक भेटघाट तथा मनोरञ्जनका अवसरहरू प्राप्त हुनेछन्। तथापि, मंगलबारपछि घरायसी समस्याले मानसिक तनाव निम्त्याउने सम्भावना छ। पढाइमा अल्छीपन तथा प्रेम सम्बन्धमा मतभेद देखिन सक्छ। राजनीतिक गतिविधि सुस्त हुन सक्छ।
मकर (भो, ज, जि, खि, खु, खे, खो, गा, गि)
सामाजिक कार्यक्रम तथा घुलमिलका अवसर प्राप्त हुनेछन्। वाणीमा प्रभावशीलता देखिनेछ, जसले व्यापारिक र परामर्शदातृ क्षेत्रमा सफलता ल्याउनेछ। न्यायिक मामिलामा अनुकूलता रहनेछ भने भौतिक सम्पत्ति सम्बन्धी अवसरहरू पनि प्राप्त हुने संकेत छन्।
कुम्भ (गु, गे, गो, सा, सि, सु, से, सो, द)
सप्ताहको प्रारम्भमा स्वास्थ्यसम्बन्धी चुनौती र आर्थिक व्ययले मनोस्थिति असहज हुन सक्छ। विश्वासको दुरुपयोगबाट उत्पन्न जोखिमले सताउन सक्ने भएकाले सचेत रहनु जरूरी हुनेछ। यद्यपि, मंगलबारपछिका दिनहरूमा परिस्थितिमा सुधार आउनेछ। प्रविधिको प्रभावकारी प्रयोगले आम्दानी र सामाजिक प्रतिष्ठामा वृद्धि हुनेछ।
मीन (दि, दु, थ, झ, ञ, दे, दो, च, चि)
पैत्रिक सम्पत्ति तथा प्राकृतिक स्रोतको उपयोगबाट लाभ प्राप्त हुनेछ। अध्ययनमा उत्कृष्ट प्रगति हुनेछ। व्यवसाय लाभदायक रहनेछ भने विदेश यात्राको सम्भावनासमेत देखिन्छ। प्रवासमा कार्यरतका लागि समय विशेष फलदायी रहनेछ। तर, सप्ताहको मध्यतिर स्वास्थ्य तथा पारिवारिक विषयमा सतर्कता आवश्यक रहनेछ।
